श्री.अरुण बारसागडे, चंद्रपूर जिल्हा प्रतिनिधी , न्यूज जागर
दि.१३ सन २०१७ ते २०२० या कालावधीत पीक कर्जाची नियमीत परतफेड करणा-या शेतकऱ्यांना ५० हजार पर्यंत प्रोत्साहनपर लाभ देण्याचा निर्णय शासनाने घेतला आहे. पात्र शेतकऱ्यांची यादी आज जाहीर करण्यात आली आहे.अशी माहिती सहकार मंत्री अतुल सावे यांनी दिली.
सदरची यादी संबंधित बँक शाखा, विविध कार्यकारी सेवा सहकारी संस्था, ग्रामपंचायत कार्यालय इत्यादी ठिकाणी सूचना फलकावर प्रसिध्द करण्यात आली आहे.
या यादीतील शेतकऱ्यांनी आपले आधार कार्ड, कर्जखाते पासबुक व बचतखाते पासबुक घेऊन नजीकच्या आपले सरकार सेवा केंद्र किंवा बँकेच्या शाखेत जाऊन आपले आधार प्रमाणीकरण करुन घ्यावे असे आवाहन श्री. सावे यांनी केले.
सन २०१७-१८, २०१८-१९ व २०१९-२० या तीन आर्थिक वर्षापैकी कोणत्याही दोन आर्थिक वर्षांमध्ये पीक कर्जाची उचल करुन शासन निर्णयामध्ये नमुद केलेल्या विहित कालावधीत परतफेड केलेली आहे. अशा शेतकऱ्यांना शासनाकडुन 50 हजार पर्यंत प्रोत्साहनपर लाभ देण्याची कार्यवाही सुरु करण्यात आली आहे.
यामध्ये प्राथमिक दृष्टया पात्र शेतकऱ्यांची यादी प्रसिध्दीसाठी बँकांना उपलब्ध करुन देण्यात आली आहे. या यादीमधील संबंधीत शेतकऱ्यांच्या नावासमोर दर्शविलेल्या विशिष्ट क्रमांकासह शेतकऱ्यांनी बँक कर्ज पासबुक व आधार कार्ड घेऊन बँकेच्या शाखेमध्ये अथवा आपले सरकार सेवा केंद्रामध्ये आधार प्रमाणीकरणासाठी जावयाचे आहे. त्याठिकाणी संगणकावर दिसत असलेल्या कर्जखात्यांचा तपशील, आधार क्रमांक इत्यादी बाबींची खातरजमा करुन शेतकऱ्यांना आधार प्रमाणीकरण करावयाचे आहे. आधार प्रमाणीकरणानंतर संबंधीत शेतकऱ्यांच्या बँक बचत खात्यामध्ये थेट प्रोत्साहनपर लाभाची रक्कम वर्ग करण्याची कार्यवाही करण्यात येणार आहे.
ज्या शेतकऱ्यांनी बँक कर्ज खात्यास आधार क्रमांक उपलब्ध करुन दिलेला नाही. अशा शेतकऱ्यांना नावे पुर्तता झाल्यानंतर समाविष्ट करण्यात येणार आहेत. त्याचप्रमाणे ज्या ग्रामपंचायत कार्यक्षेत्रामध्ये निवडणुक आचारसंहिता लागु आहे अशा गावातील पात्र शेतकऱ्यांची नावे या यादीमध्ये आचार संहिता संपल्यानंतर समाविष्ट केली जाणार आहेत असेही सहकार मंत्री श्री. सावे यांनी सांगितले.
