गडचिरोली जिल्हा प्रतिनिधी , न्यूज जागर
गडचिरोली
ता. २३ : १९ फेब्रुवारी रोजी पोलिसांनी कारवाई केलेल्या स्फाेटक साहित्य बनविण्याच्या प्रकरणातील मुख्य आरोपीला पकडण्यात गडचिरोली पोलिसांना अखेर यश आले असून या आरोपीला तामिळनाडूतील सालेम येथून अटक करण्यात आली आहे. श्रीनिवास मुल्ला गावडे, रा. भंगारामपेठा, असे अटक करण्यात आलेल्या नक्षल समर्थकाचे नाव आहे.
प्राप्त माहितीनुसार १९ फेब्रुवारी रोजी गडचिरोली पोलिसांच्या पथकाने अहेरी तालुक्यातील भंगारामपेठा गावात केलेल्या कारवाईत स्फाेटके बनविण्याचे साहित्य जप्त केले होते. चौकशीनंतर चार आरोपींना अटक करण्यात आली होती. मात्र, मुख्य सूत्रधार फरार झाल्याने त्याला शोधण्याचे मोठे आव्हान पोलिसांपुढे होते. अखेर सहा महिन्यांच्या अथक परीश्रमानंतर गडचिरोली पोलिसांनी तामिळनाडूतील सालेम येथून मुख्य आरोपी श्रीनिवास गावडे याला अटक केली आहे. सोमवार (ता. २२) त्याला न्यायालयात हजर केले असताना न्यायालयाने त्याला गुरुवार (ता. २५) पर्यंत पोलिस कोठडी सुनावली आहे. या प्रकरणात आणखी काही आरोपींना अटक होण्याची शक्यता व्यक्त होत आहे.
