अमेरिकेत स्थायिक असलेल्या मेघा जागंडा यांनी विद्यार्थ्यांना केले मार्गदर्शन
जल , जीवन व पर्यावरण यावर विद्यार्थ्यांना केले बोलते !
मूल – धर्मेंद्र सुत्रपवार
भारतात पाण्याची मुबलकता असल्याने पाण्याचे महत्व वाटत नसले तरी भविष्यात योग्य नियोजन केले नाही तर फार मोठे संकट निर्माण होऊ शकते. यासाठी शाळा मधील विद्यार्थ्यांना मार्गदर्शन करण्यासाठी मूल येथे मराठी शाळेत शिकलेल्या व सध्या अमेरिकेत स्थायी झालेल्या मेघा हरीश जागळा यांनी मूल येथील सुभाष उच्च प्राथमिक शाळा मूल येथे भेट देत विद्यार्थ्यांशी हितगुज केले. यावेळी शाळेचे मुख्याध्यापक अविनाश जगताप, पदवीधर शिक्षक राजू गेडाम आदी उपस्थित होते.
संस्कारक्षम करण्यासाठी आई वडिलांनी केलेल्या प्रयत्नामुळे आपण घडलो. त्यांनी दिलेल्या संस्काराचा फायदा समाजातील विद्यार्थ्यांना व्हावा. या उदात्त हेतूने मेघा जागंडा यांनी शोभा वसंत फाउंडेशन च्या माध्यमातून सुभाष उच्च प्राथमिक शाळेतील विद्यार्थ्यांना सखोल मार्गदर्शन केले. त्यांनी सांगितले की, मी काही भागात फेरफटका मारल्यानंतर असे आढळले की, सर्व रस्ते व नाल्या सिमेंटने बांधुन सर्व मार्ग बंद केले आहे. त्यामुळे पावसाचे पाणी जमिनीत मुरण्याला वावच नाही. अमेरिकेत मात्र रस्ते व नाली यांच्या मध्ये काही भाग सोडला जातो. त्यामुळे पाण्याचा निचरा व्हायला मदत होते. आपल्याकडे पाणी मुबलक प्रमाणात आहे मात्र त्याचा उपयोग काटकसरीने करणे आवश्यक आहे. भांडे, कपडे व इतर कामासाठी अनावश्यक पाणी वाया घालविले जाते. ते टाळण्याची गरज आहे. आपल्या आई वडिलांना पाण्याचे महत्त्व सांगुन प्रत्येक लहान लहान गोष्टीतून पाणी बचतीचे महत्त्व सांगण्याचा प्रयत्न करावा. जल है तो कल है या उक्तीप्रमाणे पाण्याचे महत्त्व समजुन घेतले पाहिजे.प्रत्येकांनी झाडे लावुन त्यांचे संगोपन करण्याची गरज आहे. तेव्हाच पर्यावरण आबाधित राहील. असेही आवर्जुन सांगितले. कार्यक्रमाचे संचालन सहाय्यक शिक्षक बंडू अल्लीवर तर आभार सहाय्यक शिक्षक योगेश पुल्लकवार यांनी मानले.कार्यक्रमाच्या यशस्वितेसाठी शाळेतील शिक्षक राहुल मुंगमोडे, अजय राऊत, रिना मसराम, संध्या आभारे निखिता पोहणे, संकेत जाधव आदींनी परिश्रम घेतले.
