आषाढी एकादशी सोमवारी (ता. १०) उत्साहात साजरी करण्यात आली. नागपूर जिल्ह्यातील तीन जण पंढरपूरला विठ्ठलाच्या दर्शनासठी गेले होते. यातील दोन तरुणाचा चंद्रभागा नदीच्या पाण्यात बुडून मृत्यू झाला. सचिन शिवाजी कुंभारे (२८, रा. जलालखेडा) व विजय सिद्धार्थ सरदार (२७, रा. नारसिंगी) असे मृत्यू झालेल्या युवकांची नावे आहेत.
नरखेड तालुक्यातील जलालखेडा व नारसिंगी येथील तीन युवक आषाढी एकादशीनिमित्त विठ्ठलाच्या दर्शनाला पंढरपूरला (Pandharpur) गेले होते. रविवारी सकाळी ते रेल्वेने पढरपूरला पोहोचले. विठ्ठलाच्या दर्शनाआधी अंघोळ करावी असे मित्रांनी ठरवले. मात्र, दोघं अंघोळीसाठी चंद्रभागा नदी पात्रात उतरले. परंतु, पाणी जास्त असल्यामुळे सचिन बुडू लागला. त्याला वाचवण्यासाठी गेलेला विजयसुद्धा पाण्यात बुडू लागला.
काही नागरिकांनी नदीत उडी घेत युवकांना वाचण्याचा प्रयत्न केला. सचिन व विजय यांना पाण्यातून बाहेर काढून रुग्णालयात नेले. परंतु, डॉक्टरांनी दोघांनाही मृत घोषित केले.
