अमरावती जागर प्रतिनिधी
वनकर्मचाऱ्यांवर आरोप
मेळघाट व्याघ्र प्रकल्पाच्या वान वनपरिक्षेत्रा अंतर्गत वारी येथील वान धरणावर मासेमारीसाठी गेलेल्या एका आदिवासी तरूणाला वन कर्मचाऱ्यांनी गरम सळाखीने चटके देऊन मारहाण केल्याचा आरोप पिडीत तरूणाने केला आहे. या आदिवासी तरुणाला धारणी येथील उपजिल्हा रूग्णालयात दाखल करण्यात आले असून दोषी वनकर्मचाऱ्यांवर कारवाईची मागणी केली जात आहे.
प्राप्त माहिती नुसार मेळघाट व्याघ्र प्रकल्पा अंर्तगत येत असलेल्या धुळघाट रेल्वे येथील अंकुश गोरेलाल मावस्कर ( 25 ) हा तरूण आपल्याच गावातील आनंद कास्देकर व पप्पू चव्हाण या दोन सहकाऱ्यांन सोबत मेळघाट व्याघ्र प्रकल्पाच्या अकोट वन्यजीव विभागा अंतर्गत वान वनपरिक्षेत्रातील वान धरणावर गेले होते. त्यांनी मासेमारीसाठी जाळे टाकले होते. या धरणावर मासेमारी प्रतिबंधित असल्यामुळे अवैध मासेमारी केल्याप्रकरणी वनकर्मचाऱ्यांनी या तिघांना ताब्यात घेतले. त्यानंतर सुमारे 7/8 कर्मचाऱ्यांनी मारहाण करून गरम सळाखीने चटके दिल्याचा आरोप अंकुश मावस्कर याने केला आहे. याप्रकरणी राणीगाव येथील सामाजिक कार्यकर्ते वहिद खान पठाण यांनी जखमी अंकुशला धारणी येथील उपजिल्हा रूग्णालयात दाखल केले असून दोषी कर्मचाऱ्यांवर तत्काळ कारवाई करण्याबाबत जिल्हाधिकारी पवनीत कौर यांच्याकडे मागणी करणार असल्याची माहिती वहीद खान पठाण यांनी दिली. यासंबंधी वनविभागाशी संपर्क केला असता वन कर्मचाऱ्यांनी अंकुशला ताब्यात घेतले नसल्याचे म्हणणे आहे. मात्र अवैध मासेमारी करणाऱ्या दोन आरोपींना ताब्यात घेतल्याचे वन अधिकाऱ्यांनी स्पष्ट केले.
